Снимокъяс висьталöны

Матыстчö Победа лун. Быд во ыджыд казьтылöмъясöн виччыся тайö лунсö. А найö йитчöмаöсь менам верöс Иван Алексеевич Поповкöд, кодi тшöтш участвуйтлiс вир кисьтана война вылас. Ёна виччысис вöрöгöс вермöмсянь 50 вося ыджыд юбилей пасйöмсö. Но эз сэтчöдзыс ов. Войнавывса пöсь тышъясын ранитчöмыс вочасöн дзикöдз кусыньтic морттö. Кувсьылic сизим во сайын. Видлавла сылысь фотокарточкаяссö и пыр кыла, мый сiйö водзтi висьтавлывлiс семья кытшын аслас боевöй туйяс йылысь. Кыдзи и быд салдатлы, эз кокни вöв сылы. Воюйтiс Украинаын. Прöстöй пулемётчиксянь, миномётчиксянь воöдчис взводса командирöс вежысьöдз. Кутшöм сöмын сьöкыд пыр эз мунлыны боецъяс! Некор эз повзьывны, воськов бöрлань эз вöчны. Пыр вöлiны дасьöсь немечöс паныдавны штыкöн. Повтöмлуныс и сюсьлуныс тырмис налöн. А вöрöгкöд паныдасьлöмыс унаысь лолiс. Сiдз, öтчыд пöсь тыш бöрын боецъяс шойччöны, вöлöм, вöр дi дорын — кодъяскö весалicны öрудиеяс, кодъяскö лöсьöдчисны нуръясьны. Нинöм виччысьтöг кустъяс пиысь мыччöдчöма öти немеч, кыпöдöма кисö, медым граната шыбитны роч салдатъяс пöвстö. Но абу удитöма. Менам ве­рöс, сiйöс казялöм бöрын, водзджык вевъялöма ciйöс помавны. Мыйта йöзöс мездiс пöгибнитöмысь. Татшöм лоöмторсö эськö унаысь висьтавлiс, да ме, пöрысь мортыд, унатор нин ог помнит, унатор нин вунöма. Сöмын верма пасйыны, мый Иван Алексеевич бергöдчис война вылысь II группаа инвалидöн да морöс тырыс наградаöн. Сьöкыд дойяс вылö видзöдтöг, пыр вӧлi уджын. А сiйö вöлi мастер пöжасьны. Эз öд прöстö ас сиктсаяс шуны сiйöс Пекар Ваньöн. Мыйсö сöмын эз сяммыв пöжавнысö — кöлач-пренник, быдсикас торт, зефир, булки-нянь. Ыдждöдтöг шуа, ёна ошкывлiсны сылысь пöжасъяссö.

Кыдзи верöсöс, нэмöвöйся ёртöс, челядьлысь батьöс да кыдз мортöc, пуктывлi пыдии, и öнi на лыддя сiйöс бур да шань сьöлöма мортöн. И йöзыс оз лёкöн казьтывлыны сiйöс.

А. ПОПОВА.

Кулöмдiн.

Снимокъяс вылын: И.А. Попов гӧтырыскöд; И.А. Попов Кебанъёльса нянь пожалан заводын уджалiгöн; Куломдiнын Победа лунö парад вылын. И.А. Попов медводдза радас шуйгавывсянь первойыс.

Парма гор, 1999, Май 8 лун (53 №)